Malapit na ang wakas, dapat nang magtalaga,
May pag-ulan ng yelo, ang pader ay magigiba,
Marami ang tatakas, mawawala ang panangga,
Maging mapagpuyat, biglaan ang pagdating niya.
.
Makikita siya ng lahat mula sa alapaap,
Matatakot ang mga hari magtatago sa isang iglap,
Ang anak ng tao darating siya na parang kidlat,
Darating na may kaluwalhatian mula sa mga ulap.
.
Malapit nang gantimpalaan ang mabubuting katiwala,
Ngunit parusa naman sa lahat ng nagpapabaya,
Silang nang-aalipin na tila may alila,
Lahat ay lasing na sa lahat ng tinatamasa.
.
May pagtatatak na mula sa apat na hangin,
Mula sa wakas ng lupa, lahat ay titipunin,
Maraming mamamatay, maliban lang sa may tatak,
Silang may mabubuting puso tinatawag na mga hamak.
.
Nakahanda na ang tabak na puputol sa mga puno,
Tumaas ng tumaas, hindi na maabot ng kahit sino,
Nakasuot ng maskara, makikilala kung sino-sino,
Sinong makakatagal sa parusa ng anak ng tao?
.
Sino ang tumikim sa ipinagbabawal na bunga?
May babala na dati, alam na ang parusa,
Itinuring ang sarili na tila Dios na maylikha,
Ngunit pagdating ng Anak ng Tao lahat ay mabibigla.
.
Marami ang iiyak, marami ang magtataguan,
Mga nanakit sa katawan niya di alam ang patutunguhan,
Takot na takot sila sa biglaang pagpaparusa,
Mayayanig ang lahat, mananangis ang mga bansa.
.
.
Pahayag 1 ASND
7Magsipaghanda kayo! Darating si Jesus na nasa mga ulap. Makikita siya ng lahat ng tao, pati na ng mga pumatay sa kanya. At iiyak ang mga tao sa lahat ng bansa sa mundo dahil sa takot nilang sila ay parurusahan na niya. Totoo ito at talagang mangyayari.
.
Pahayag 3 ASND
4Ngunit may ilan sa inyo riyan sa Sardis na hindi nahawa sa masamang gawain ng iba. Lalakad silang kasama ko na nakasuot ng puting damit, dahil karapat-dapat sila. 5Ang magtatagumpay ay bibihisan ng puting damit at hindi ko aalisin ang pangalan niya sa aklat na listahan ng mga taong binigyan ng buhay na walang hanggan. Ipapakilala ko sila sa aking Ama at sa kanyang mga anghel na sila ay mga tagasunod ko.
.
Pahayag 16 ASND
Pero sinabi ng Panginoon, “Makinig kayong mabuti! Darating ako na tulad ng magnanakaw dahil walang nakakaalam. Mapalad ang taong nagbabantay at hindi naghuhubad ng kanyang damit, upang sa pagdating ko ay hindi siya lalakad na hubad at hindi mapapahiya sa mga tao.”
